Sog'inchda yashadim senga yetguncha,
To sendan – sengacha o'tgandek umrim.
O'n bir oy sog'inchda yashadim qancha,
Nihoyat yetindim, bisyor shukurim.
Xush kelding, xush ko'rdik yo Ramazonim,
Haqdan bandasiga buyuk ehsonim.
Shafoat oyida umidvor yurak,
Sahovatli qo'llar bog'i o'zingsan.
Quvonchning nurila yorishgan falak,
Oylarning mohi-yu, shohi o'zingsan!
Xush kelding, xush ko'rdik yo Ramazonim,
Haqdan bandasiga buyuk ehsonim.
Muruvvat elchisi, fayzga boyim,
Dunyoga sig'maydi mehrim, Ramazon.
Bu mehmon dunyoda, ey, mehmon oyim.
Sen ila ketsaydi ruhim, Ramazon.
Xush kelding, xush ko'rdik yo Ramazonim,
Haqdan bandasiga buyuk ehsonim.
